दुर्गा प्रसाद खतिवडा(दुर्गेश)
काठमाडौं, ५ चैत। अभिनेता राजेश हमाल लाई फिल्म निर्माणका लागि ल्याउने बहानामा रकम हिनामिना गरेको आरोपमा चार जनाविरुद्ध भ्रष्टाचार मुद्दा दायर गरिएको छ।
अख्तियार दुरुपयोग अनुसन्धान आयोग ले अछामको ढकारी गाउँपालिकाका अध्यक्ष प्रकाशबहादुर साउद, निमित्त प्रमुख प्रशासकीय अधिकृत लक्ष्मण साह, लेखापाल विमल साउद तथा आरजे २४ न्युज एवं इन्द्रेणी फाउन्डेसनका अध्यक्ष रामजी लम्साल (रामबहादुर लम्साल) विरुद्ध विशेष अदालतमा मुद्दा दायर गरेको हो।
अख्तियारका अनुसार, हमालको नाम जोडेर फिल्म निर्माण गर्ने भन्दै गाउँपालिकाबाट १५ लाख रुपैयाँ बजेट विनियोजन गरिएको थियो। सोही रकममध्ये १२ लाख ७७ हजार २ सय ५० रुपैयाँ भुक्तानी भई अनियमितता भएको पाइएको दाबी गरिएको छ।
अनुसन्धानपछि हमालको नाम दुरुपयोग गरी रकम हिनामिना गरेको पुष्टि भएपछि सोही रकम बराबर बिगो कायम गरी चारै जनाविरुद्ध कैद तथा जरिवानाको मागसहित मुद्दा दायर गरिएको आयोगले जनाएको छ।
