काठमाडौं, ५ चैत । सर्वोच्च अदालतले रवि लामिछानेसँग सम्बन्धित मुद्दामा महान्यायाधिवक्ताको संशोधित निर्णय पेश गर्न आदेश दिएको छ। न्यायाधीश सारंगा सुवेदी र सुनिलकुमार पोखरेलको इजलासले यसअघि भएको २ माघको निर्णयसमेत अनिवार्य रूपमा पेश गर्न निर्देशन दिएको हो।
महान्यायाधिवक्ता सबिता भण्डारी बरालले गत ३० पुसमा लामिछानेको हकमा मात्रै आरोपपत्र संशोधन गर्ने निर्णय गरेकी थिइन्। तर, त्यसको दुई दिनपछि २ माघमा भने लामिछानेसहित अन्य सबै आरोपितहरूको हकमा पनि आरोपपत्र संशोधन गर्ने अर्को निर्णय गरिएको थियो।
सर्वोच्चमा प्रारम्भिक रूपमा ३० पुसको निर्णय मात्र पेश गरिएको पाइएपछि इजलासले २ माघको निर्णय पनि झिकाएर पेश गर्न आदेश दिएको हो। साथै, हालको इजलासले उक्त मुद्दा नहेर्न सक्ने संकेत गर्दै, सुनुवाइका लागि उपयुक्त न्यायाधीश सम्मिलित अर्को इजलासमा पेश गर्न निर्देशन दिइएको छ।
यस आदेशसँगै लामिछानेसम्बन्धी मुद्दाको सुनुवाइ केही समय पछाडि सर्ने देखिएको छ।
