दुर्गा नारायण खतिवडा
कानेपोखरी, ५ चैत । इनिसा बिक प्रकरणको निष्पक्ष छानबिन र दोषीलाई कडा कारबाहीको माग गर्दैमंगलबार कानेपोखरी गाउँपालिका–६ मा विद्यार्थीहरूले विरोध प्रदर्शन गरेका छन्।
कानेपोखरी–६ स्थित पर्ल एकेडेमी प्लस टु ब्लकमा कक्षा ११ मा अध्ययनरत विद्यार्थीहरूको अगुवाइमा भएको उक्त प्रदर्शनमा पल एकेडेमी का कक्षा ५ देखि ११ सम्म अध्ययनरत विद्यार्थीहरू पनि सहभागी भएका थिए।
प्रदर्शनमा सहभागी विद्यार्थीहरूले ‘न्याय चाहिन्छ, ‘दोषीलाई कारबाही गर’, ‘महिला हिंसा बन्द गर’ लगायतका नाराबाजी गरेका थिए।
पर्ल एकेडेमी प्लस टु ब्लकका संचालक होम कुमार मते ले दिएको जानकारी अनुसार इनिसा बिक घटनाप्रति ध्यानाकर्षण गराउँदै पीडितलाई न्याय दिलाउनका लागि विद्यार्थीहरू स्वतःस्फूर्त रूपमा सडकमा उत्रिएका हुन्।
स्थानीय स्तरमै विद्यार्थीहरूको सक्रियताले समाजमा बढ्दो महिला हिंसाप्रति चिन्ता व्यक्त गर्दै न्यायका लागि आवाज उठाउनुपर्ने आवश्यकता औंल्याएको छ।
इनिसा बिक नामकी बालिका सँग सम्बन्धित जवरजस्ती करणी पछि हत्या गरिएको शंकास्पद घटना सार्वजनिक भएपछि यो केस चर्चामा आएको हो।
