काठमाडौं — घोडे जात्रा को अवसरमा बुधबार चैत कृष्ण औँसीका दिन काठमाडौं उपत्यकामा परम्परागत रूपमा घोडे जात्रा मनाइएको छ। उपत्यकामा प्रचलित प्राचीन जात्रामध्ये एक मानिने यो पर्व विशेष सांस्कृतिक महत्व बोकेको छ।
परम्पराअनुसार प्राचीनकालमा उपत्यकामा एक राक्षसले बालबालिकालाई दुःख दिने र मार्ने गरेको जनविश्वास छ। उक्त राक्षसलाई घोडाको टापले कुल्चाएर अन्त्य गरिएको कथासँग जोडेर यो जात्रा मनाइँदै आएको हो। यही विश्वासलाई निरन्तरता दिँदै काठमाडौंको टुँडिखेल मा नेपाली सेना ले विशेष समारोह आयोजना गरेको थियो।
समारोहमा घोडाका विविध कला र कौशल प्रस्तुत गरिएका थिए।कार्यक्रममा रामचन्द्र पौडेल, रामसहायप्रसाद यादव लगायत उच्च पदस्थ व्यक्तित्वहरूको उपस्थिति रहेको थियो।
घोडेजात्राका अवसरमा सैनिक ब्यान्डद्वारा विभिन्न धुन प्रस्तुत गरिएको थियो भने घोडाहरूले शो जम्पमार्फत विभिन्न अवरोध पार गर्ने कला देखाएका थिए। साथै, साहसिक सैनिकहरूले घोडासहित पर्खाल नाघ्ने, टेण्ड पेगिङजस्ता युद्ध अभ्याससम्बन्धी प्रस्तुति पनि प्रदर्शन गरेका थिए। घोडा दौड तथा तालिमप्राप्त कुकुरहरूको प्रस्तुति पनि दर्शकका लागि आकर्षण बनेको थियो।
कार्यक्रममा विभिन्न प्रतिस्पर्धामा उत्कृष्ट प्रदर्शन गर्ने सैनिकहरूलाई राष्ट्रपति पौडेलले पुरस्कार प्रदान गरेका थिए।
एक समय युद्धमा अत्यन्तै महत्वपूर्ण मानिएको घोडाको प्रयोग आधुनिक सवारी साधनको विकाससँगै घट्दै गएको भए पनि यसको ऐतिहासिक र सांस्कृतिक महत्व अझै कायम रहेको छ।
